செப்டம்பர் 23, 2017

தமிழ்மொழியும் இலக்கியமும் – வடமராட்சி வலயக் கல்வி அலுவலகம் ஏற்பாடு செய்த மாணவர் முகாம்



க.பொ. த (சா த) 2017 இல் பரீட்சைக்குத் தயாராகும் மாணவர்களில் தெரிவுசெய்யப்பட்ட ஒரு தொகுதி மாணவர்களுக்கான மாணவர் முகாம் (செப்ரெம்பர் 2017) 22 மற்றும் 23 ஆந் திகதிகளில் வடமராட்சி வலயக் கல்வி அலுவலகத்தால் ஏற்பாடு செய்யப்பட்டது. வேலாயுதம் ம. வித்தியாலயம், வல்வை சிவகுரு வித், இமையாணன் அ.த.க.பாடசாலை, அல்வாய் சிறீலங்கா, நெல்லியடி மத்திய மகா வித்தியாலயம், உடுத்துறை ம. வித்தியாலயம், அம்பன் அ.மி.த.க பாடசாலை ஆகிய 7 நிலையங்களில் 300 வரையான மாணவர்களை ஒன்றிணைத்து இரண்டு நாள் பயிற்சியினை வழங்கியது. இதில் இமையாணன் அ.த. க பாடசாலையில் இடம்பெற்ற (மாணவர் முகாம்) கருத்தரங்கில் இருந்து சில ஒளிப்படங்கள்.
(படங்களும் பதிவும் : சு.குணேஸ்வரன்)









பிப்ரவரி 02, 2017

என் பத்துவயது நினைவுகளில் ஊறியிருந்த 'பெரிய கடற்கரை' இப்போதும் அழகுதான்




என் பால்யவயது நினைவுகளில் ஒரு கனவுக்காட்சிபோல் மிதந்துகொண்டிருக்கும் என் கிராமத்தின் வனப்பு மிகுந்த இடங்களில் என்னால் மறக்கமுடியாத இடங்களில் ஒன்று தொண்டைமானாறு பெரிய கடற்கரை. அதிகாலையிலேயே களைகட்டும் பெரிய கடற்கரை சந்தை. அதன் அருகிலேயே கடலையும் மணலையும் தொட்டு நிற்கும்அந்தக்கால பழுதடைந்த பெரிய இயந்திரப்படகு. தெற்கிலிருந்து கடலைநோக்கி ஓடிக்கொண்டிருக்கும் மழைநீர் தேங்கிய வாய்க்கால். அதில் தென்னோலைகளை ஊர்மக்கள் ஊறப்போட்டிருக்கும் காட்சி. பனையோலை மூரியாலும் தென்னோலைகளாலும் அடைக்கப்பட்ட காணிகள். வருடத்தில் ஒருமுறை வீரகாமாளி அம்மன் ஆலயத்தின் விசேட திருவிழாவும் மின்வெளிச்சத்தின் அலங்காரங்களும். அந்தத்திருவிழாவுக்காக பெரியவர்களால் கட்டப்பட்ட கயிற்றுக்கு அப்பால் மணலில் கிடைத்த சிறிய ஊரிக்கற்களைப் பொறுக்கி நண்பர்களுக்கும் நண்பிகளுக்கும் எறிந்து விளையாடிய ஞாபகங்கள்.

அந்த இடமே இப்போ அடியோடு மாறிவிட்டாலும் பெரிய கடற்கரை தன் அழகை மட்டும் ரகசியமாக தேக்கி வைத்திருக்கிறது. அண்மையில் எனது ஆசிரிய நண்பர் ஒருவர் கேட்டார், "இப்படி ஒரு அழகான இடத்தை எங்களுக்குக் காட்டாமல் மறைத்தா வைத்திருந்தீர்கள்" என்று!
-சு.குணேஸ்வரன் -












அக்டோபர் 10, 2015

வடமராட்சி சுருக்கெழுத்துக் கழகம் - கவியரங்கு



வடமராட்சி சுருக்கெழுத்துக் கழகத்தின் 30ஆவது ஆண்டு நிறைவையொட்டி "நேற்று இன்று நாளை - சுருக்கெழுத்துக் கழகம்" என்ற தலைப்பில் கவிஞர் த. ஜெயசீலன் தலைமையில் இடம்பெற்ற கவியரங்கு. கவியரங்கில் க. சின்னராசன், அ.பௌநந்தி, சு. குணேஸ்வரன் ஆகியோர் கவிதை படித்தனர். அதன் இணைப்பு கீழே தரப்படுகிறது. (நன்றி : த.ஜெயசீலன்)
http://www.thanajeyaseelan.com/mp3/netruindrunaalaikaviyarangam.MP3




ஜூன் 20, 2015

"வாசிப்புக்கும் நட்புக்கும் இலக்கணமான வரதண்ணா"




  ஈழத்தின் புகழ்பூத்த கவிஞர்களில் ஒருவராகிய வே.ஐயாத்துரை அவர்களின் மகனும் கவிஞருமாகிய வே.ஐ வரதராஜன் இன்று காலை (20.06.15) மறைவடைந்த செய்தியறிந்து மிகுந்த அதிர்ச்சியடைந்தோம்.கடந்த சில மாதங்களாக நோய்வாய்ப்பட்டிருந்த போதிலும் அண்மைக்காலத்தில் ஓரளவு அதிலிருந்து தேறியிருந்தார். எனினும் எம்மை ஏமாற்றிவிட்டார்.

   எனது மனைவிக்கு அண்ணன் முறை உறவினரானபோதிலும் நான் அன்புடன் வரதண்ணா என்றுதான் அழைப்பேன். அரியாலைக்கும் அல்வாய்க்கும் ஒரு இணைப்புப்பாலம் போல் எங்கள் உறவுகளோடு உறவாக வந்து போய்க்கொண்டிருப்பார். தந்தை ஐயாத்துரையின் கவிதைப் பாரம்பரியத்திற்கு ஊடாக வந்த வரதராஜன் அவர்கள் அடிப்படையில் ஒரு தீவிர வாசகன்.

  வாசிப்புக்கும் எழுத்துக்கும் நட்புக்கும் இலக்கணமாக எனக்கு முன்நிற்கும் உதாரண புருஷன் வரதண்ணாதான். எனது திருமண உறவோடு தொடங்கிய வரதண்ணாவின் நட்பு இன்று வரையும் நீடித்திருப்பதற்கு உறவுவழித் தொடர்பு என்பதையும் தாண்டி இலக்கியத் தொடர்புதான் முதன்மையாக இருந்துள்ளது.

  நான் அறிந்த வரையில் யாழ்ப்பாணத்தில் இவரைப்போல தீவிர இலக்கிய நேசர்களைக்காண்பது மிக அரிது. ஈழத்து எழுத்தாளர் முதல் தமிழக எழுத்தாளர் வரை மேலைத்தேய எழுத்துக்கள் முதல் மொழிபெயர்ப்பு இலக்கியங்கள் வரை தீவிரமாக உரையாடுவார். அவரின் வாசிப்புக்கும் பட்டறிவுக்கும் ஏராளமாக நூல்களை எழுதியிருக்கமுடியும். ஆனால் மிகத் தாமதமாகவே கவிதை மற்றும் இலக்கிய முயற்சிகளில் ஈடுபட்டார். கலைமுகம், ஞானம், ஜீவநதி இதழ்கள் மிகக்கூடிய அக்கறையெடுத்து அவரின் படைப்புக்களுக்கு களம் அமைத்துக் கொடுத்தன. இவை தவிர வேறு பல இதழ்களிலும் பத்திரிகைகளிலும் எழுதியுள்ளார். கலைமுகம் இதழ் விரிவான நேர்காணல் ஒன்றையும் வெளியிட்டிருந்தது. அவரின் “என் கடன்” என்ற கவிதைத்தொகுப்பு ஜீவநதி வெளியீடாக வெளிவந்திருக்கிறது.


  வரதராஜனிடம் நான் கவனித்த மிக முக்கியமான மற்றொரு பண்பு நட்புப் பாராட்டுவது. அவரவரின் தகுதிக்கு ஏற்ப உரையாடுவதிலும் கூடியவரையில் நட்பைப் பேணுவதிலும் மிகுந்த நாட்டமுடையவர். ஒரு புத்தகம் அவரின் கைக்குச் செல்லுமானால் அந்த நூலை மிகக்குறைந்தது மூவராவது வாசித்திருப்பார்கள். அதையும் சொல்லித்தான் வாங்குவார். நான் இதை இன்னாருக்கும் வாசிக்கக் கொடுப்பேன் என்பார்.

   அவருடன் ஒரு நூல் பற்றியோ அல்லது எழுத்தாளர் பற்றியோ உரையாடுவது மிகுந்த இன்பமளிப்பதாகும். எனக்கு நல்ல மொழிபெயர்ப்பு நூல்களை அறிமுகம் செய்தவர். எனது வாசிப்புக்கும், ஆய்வுத்தேவைகளுக்கும் பல வழிகளில் உதவியிருக்கிறார். தன்னிடம் இல்லாவிட்டாலும் எங்கே இருக்கிறதெனத் தேடித்தந்திருக்கிறார்.

   தனது தந்தையார் ஐயாத்துரை நினைவாக வருடாவருடம் யாழ் இலக்கிய வட்டத்தின் அனுசரணையுடன் குறித்த வருடத்தில்வெளிவந்த சிறந்த கவிதை நூலைத்தெரிவு செய்து அன்னாரின் குடும்பத்தினர் கவிஞர் ஐயாத்துரை விருதினை வழங்கி வந்துள்ளார்.

   ஈழத்தில் எந்த வொருஇலக்கிய நிகழ்விலும் தவறாமல் கலந்து கொள்வார். ஈழத்துச் சஞ்சிகைகளை வாங்கி மற்றவர்களையும் ஊக்குவிப்பார். தந்தையாரின் மரபுக்கவிதைப் பின்னணியில் இருந்து வந்தாலும் அண்மைக்கால கவிதைப்போக்குக்கு சமாந்தரமாகப் பயணிக்கக்கூடிய கவிதைகளைத் தந்திருக்கிறார். அவரின் தொடர்ச்சியான வாசிப்பும் சமூகத்தை நுண்மையாக அவதானிக்கும் பண்பும் அவரின் கவிதை மொழியில் எளிமையையும் பிரச்சினையின் தீவிரத்தையும் எடுத்துக்காட்டுவனவாக அமைந்திருந்தன.

   பல நூல்கள் பற்றி உரையாடும்போது “இதைப்பற்றி ஒரு கட்டுரையாக எழுதுங்கள் அண்ணா” என்றால் “சரி பார்ப்போம்” என்பார். ஆனால் எழுதமாட்டார். அடுத்தகணம் புதிதாக வந்த நூலுடன் இருப்பார். வாசிப்பதில் ஒரு சுகானுபவத்தைக் காண்பவர். நண்பர்களின் நட்பில் தோய்பவர். இன்று (20.06.15) காலை, அவரின் உயிரற்ற உடலின் முன்னால் தலைமாட்டில் திருமறைக்கலாமன்றம் நடாத்தவிருக்கும் மூன்றுநாள் இலக்கிய விழாவுக்கான அழைப்பிதழ் அவரின் முகவரியுடன் இருந்ததையும் கண்டேன். உள்ளங் கலங்கி விட்டது.

   இனி அவரின் எழுத்துக்கள் மட்டுமே அவரின் நினைவுகளாக எம்மிடம் எஞ்சியிருக்கப் போகின்றன.

- சு. குணேஸ்வரன்

வே.ஐ. வரதராஜனின் 'என் கடன்' கவிதைநூல்

மார்ச் 27, 2015

எனது இரண்டு கவிதைகள்




கவிஞர் சோ. ப அவர்கள் மொழிபெயர்த்து வெளியிட்ட Sri Lankan Tamil Poetry – An Anthology என்ற ஈழக்கவிகளின் 67 கவிதைகள் அடங்கிய நூல் வெளிவந்துள்ளது. அத்தொகுப்பில் என்னுடைய இரண்டு கவிதைகளும் உள்ளடங்கியுள்ளன. 'தூக்கணாங்குருவிக்கூடு', 'ஒரு மரணம் சகுனம் பார்க்கிறது' ஆகிய இரண்டு கவிதைகளும் "The weaver’s nest", "Death lurks" என கவிஞர் சோ. ப அவர்களால் ஆங்கிலத்தில் மொழிபெயர்க்கப்பட்டுள்ளன. முதல் முதலில் ஆங்கிலத்திற்கு எனது கவிதைகளை மொழிபெயர்த்த கவிஞர் சோ. ப அவர்களுக்கு நன்றியும் அன்பும்.





செப்டம்பர் 07, 2014

நூல்தேட்டம் தொகுதி 9




என்.செல்வராஜா தொகுத்துத்தரும் நூல்தேட்டம் தொகுதி 9 (2014) இல் எனது நான்கு நூல்கள் பற்றிய பதிவு இடம்பெற்றுள்ளது. செல்வராஜா அவர்களுக்கு மிக்க நன்றியைத் தெரிவித்துக் கொள்கிறேன்.





மார்ச் 25, 2014

க. ஆதவன் எழுதிய 'மண்மனம்'


க. ஆதவன் எழுதிய 'மண்மனம்' நாவலை மின்நூல் வடிவத்தில் முழுமையாக வாசிக்கமுடியும். அதனை வசதிகருதி 3 பகுதிகளாக இணைத்துள்ளேன்.(நேரடியாக எனது மின்நூல் தளத்திற்குச் சென்றும் வாசிக்கலாம்.http://issuu.com/thinaippunam)

பகுதி - 1


பகுதி - 2


பகுதி - 3